காராளர்(மலையாளி) இன கடவுளும் பிற இனமும்...

1.பலாப்பாடி வரதராசப்பெருமாள் கோவில் வன்னியர் உரிமை:

கிழக்கு தொடர்ச்சி மலையில்,கல்வராயன் மலை தொடர்ச்சியில் வாழப்பாடி,பேளூர் பகுதிக்கு உட்பட்ட பலாப்பாடி கிராமத்தில் காராளர் என்னும் மலையாளக்கவுண்டர் இன மக்கள் வசிக்கிறார்கள்.

இவ்வூரில் நடுஅண்ணன் (பச்சை மலையாளி) பிரிவு மக்களுக்கு சேர்ந்த தெய்வமான திரு வரதராசப்பெருமாள் கோவில் அமைந்துள்ளது.இக்கோவிலுக்கு அண்டை ஊரிலிருக்கும் தும்புடையார் வீடு,மால வீடு மற்றும் சில குலத்தை சேர்ந்த அனைவரும் படி(ஒரு படி பச்சை அரிசி) கொடுத்து பொங்கலிட்டு திருவிழா எடுப்பது வழக்கம்.

அப்படி ஒரு நாள் திருவிழா வேளையில் அண்டை ஊரில் ஒரு சாவு நிகழ்ந்து விடுகிறது, ஆதலால் பெரும்பான்மையான மக்கள் வரமுடியாமல் போகவே கோவிலின் தேரை தூக்குவதற்கு ஆள் பற்றாக்குறை ஏற்படுகிறது. திருவிழாவை நிறுத்தினால் தெய்வக்குற்றம் ஏற்படும் என்று பக்கத்து ஊரான சின்னமநாய்க்கன்பாளையத்தை சேர்ந்த வன்னியரை பலாப்பாடி ஊரார் உதவிக்கு அழைக்கின்றனர்.

"இனிவரும் காலங்களில் எங்களுக்கு இந்த கோவிலில் என்ன உரிமை கொடுப்பீர்கள்" என வன்னியர் இன மக்கள் பலாப்பாடி ஊராரிடம் கேட்க" ஒவ்வொரு திருவிழாவின் போதும் ஒரு குறிப்பிட்ட சாமி தேரை தூக்கும் உரிமை உங்களுக்கு" என பலாப்பாடி ஊரார் உறுதியளிக்கின்றனர் வன்னியர் மக்களும் ஒப்புக்கொள்ள அன்று திருவிழா நடைபெறுகிறது.அன்றிலிருந்து வன்னிய மக்களுக்கும், மலையாளக் கவுண்டருக்கும்(காராளர்) தொடர்பு ஏற்படுகிறது.

அனால்,சற்று காலத்திற்கு முன்பு வன்னியர்கள்,பலாப்பாடி ஊரில் பஞ்சாயத்தை கூட்டி கோவிலின் தேரின் உரிமையை எழுத்து பூர்வமாக கேட்க,பலாப்பாடி ஊரார் "எங்களின் முன்னோர்கள் உங்களுக்கு வாய்மொழியாக சொன்னபோதே நீங்கள்

கேட்டிருக்க வேண்டும், இப்பொழுது இயலாது, உங்களுக்கு கொடுத்த உரிமையை நீங்கள் நிறைவேற்றலாம்"என கூறி,எழுத்து மூலத்துக்கு மறுப்பு தெரிவித்துள்ளனர்.அன்றிலிருந்து வன்னியர்கள் இந்த உரிமையை மறுத்து,கோவிலுக்கு வருவதை நிறுத்தி விட்டனர்.

தகவல் - காராளர் துரைசாமி கவுண்டர்,சிறுமலை கிராமம்.

2.கோலாத்துக்கோம்பை இளையராமர் கடவுளும் வன்னியரும்:

காராளர் (மலையாளக் கவுண்டர்) இனத்தில் நடு அண்ணன் இனத்தை சேர்ந்த மக்கள் பச்சை மலையில் வாழ்ந்து வருகின்றனர்.

(*பச்சை மலையில் இளையபெருமாள் (இளையராமர்) கோவில் இல்லை.கல்வராயன் மலையில் உள்ளது)

பச்சை மலை காராளரில் (மலையாள கவுண்டர்) பெரிமாக்கட்டி என்னும் குலத்தை சேர்ந்தவர்கள் சில நூற்றாண்டுகளுக்கு முன் பஞ்சத்தின்போது தங்கள் குலதெய்வமான இளைய பெருமாள்(இளைய ராமர்) சாமியோடு குடிபெயர்ந்து,பேளூருக்கு பகுதியில், சின்னமநாய்க்கன்பாளயத்துக்கு அருகிலுள்ள ஊரான கோலாத்துக்கோம்பை என்னும் ஊரில் வந்து அமர்ந்தனர்.பின் சில நூறு வருடங்கள் கழித்து சில காரணங்களால் தங்கள் குலசாமியை அங்கயே விட்டுவிட்டு,அருகிலுள்ள கல்வராயன் மலைதொடர்ச்சியிலுள்ள சிறுமலை என்னும் ஊரில் குடிபெயர்கின்றனர்.

காராளர் மக்கள் வெளியேறியப்பின் அவ்வூரில் வன்னியர் இன மக்கள் குடியேற்றம் நடந்துள்ளது.இளைய பெருமாள்(இளையராமர்) கோவில் வன்னியர் மக்கள் வசம் சென்றது. இப்பெருமாளுக்கு ஒவ்வொரு திருவிழாவையும் அங்கிருக்கும் வன்னிய மக்களே சிறப்பாக நடத்துகின்றனர். இருந்தபோதும் திருவிழாவின் போது காராளர்(மலையாளி) இன பெரிமாக்கட்டி குலத்தை சேர்ந்த ஒருவர் பூசாரியாக இருக்கிறார்.

3.மூக்கனூர் இளைய பெருமாள் கோவிலும்,உடையார் இனமும்

சேலம் மாவட்டத்தில்,அரூர் செல்லும் சாலையில் குப்பனூர் என்னும் ஊரில் உடையார்களில் நத்தமான் பிரிவை சேர்ந்தவர்கள் வசித்து வருகிறார்கள்.

அதன் பக்கத்து ஊர்களான பூவனூர், கொட்டாயூர், தாதனூர் மற்றும் மூக்கனூர் ஆகிய ஊர்களில் நடு அண்ணன் வகையை சார்ந்த காராளர்(மலையாளக்கவுண்டர்கள்) மக்கள் வசித்து வருகின்றனர். 

(*குப்பனூர்  உடையார் இன மக்களும், காராள மக்களும் மாமன் மச்சான் போன்று பழகுவார்கள், ஆனால் இரு இனத்துக்கும் திருமண உறவு இல்லை.)

இந்த நான்கு ஊரின் கவுண்டர்களுக்கு பொதுவான கோவிலாக மூக்கனூரிலுள்ள திரு இளைய பெருமாள் (இளையராமர்) கோவில் உள்ளது.இவ்வூர்கள் இருபுறமும் சேர்வராயன் மலைத்தொடர்களும் மலைத்தொடர்களும் சூழ்ந்து கல்வராயன் காணப்படுவதால், இப்பகுதி மக்கள் வேட்டைக்கு போவது வழக்கம்.

அப்படி ஒரு நாள் காராளர்களில்(மலையாளி) சிலப்பேர் வேட்டைக்கு சென்று ஒரு பெரிய காட்டுப்பன்றியை வேட்டையாடுகின்றனர். தங்கள் வேட்டையின் திறமையை ஊர்வலமாக சென்று மக்களுக்கு காட்டுகின்றனர்.அப்படி ஊர்வலமாக செல்லும்போது குப்பனூருக்கும் செல்கின்றனர்.குப்பனூர் உடையார்கள் அவைகளை வரவேற்று,மரியாதை நிமித்தமாக துணிவிரித்து அமரவைத்து பருகுவதர்க்கு தண்ணீர் கொடுக்கின்றனர். பின் வேட்டையை பற்றி பேசுகின்றனர். இறுதி நேரத்தில் உடையார்கள் காராளர்களிடம் "இளையராமர் சாமித்தேர் எங்கள் ஊரையும் தண்ட (உலா) வேண்டும், பொங்கல் வைக்கும் உரிமை எங்களுக்கும் தர வெண்டும்" என கேட்க,பழகும் பழக்கத்தின் காரணமாக காராளர்களும்(மலையாளி) சரி என ஒப்புதழ் அளிக்கின்றனர்.

இளையபெருமாள்(இளைய ராமர்) சாமி திருவிழாவின்போது ஒவ்வொரு ஊரின் பொங்கலுக்கும் சாமிக்கொடையை அனுப்பி பொங்கலை கொண்டு வருவது வழக்கம்.அப்படி ஒரு திருவிழாவின் போது, உடையார்கள் முதலில் பொங்கல் வைத்து "நாங்கள் பொங்கல் வைத்துவிட்டோம் குடையை அனுப்புங்கள்"எனக்கூற காராளர்களும் யோசிக்காமல் குடையை அனுப்பி பொங்கலை கொண்டு வருகிறார்கள்.

அதற்கடுத்த  திருவிழாவின் போது "முதல் பொங்கல் எங்களுடயதுதான்,குடையை முதலில் எங்களுக்குத்தான் அனுப்ப வேண்டும்"என்று கூறி,போன வருட திருவிழாவை சுட்டிக்காட்டி உரிமை

கோருகின்றனர்.பின் காராளர்கள்(மலையாளி),கொடுத்த வாக்கை மீறக்கூடாது என ஒப்புக்கொள்கின்றனர்.

அன்றிலிருந்து காராள(மலையாளி) மக்களின் இளையபெருமாள்(இளையராமர்) கடவுளை, குப்பனூர் உடையார் இன மக்களுக்கும் கும்பிட ஆரம்பித்து விட்டனர்.

தகவல் - காராளர் தனபால் கவுண்டர், பூவனூர்.

4.பெருமா பாளையம் சென்றாய பெருமாள் கோவிலும் வன்னியர் இனமும்:

சேலம் மாவட்டம் வலசையூருக்கு அருகிலுள்ள பெருமா பாளையம் என்ற ஊரில் மூலட்டான் குலம்(வாச்சான் குலம்) பிரிவை சார்ந்த காராளர்(மலையாளி) இன மக்கள் வாழ்ந்து வந்தனர்.இவர்கள் பச்சை மலையையிலிருந்து இட்பெயர்ந்தவர்கள்.

இருநூறு அல்லது முன்னூறு ஆண்டுகளுக்கு முன்பு பெருமா பாளையத்தில் இந்த காராள மக்கள் விவசாயம் செய்து வசித்து வந்துள்ளனர்.

இவர்களின் பங்காளிகள் மட்டும் சேர்ந்து வணங்கும் வீட்டு சாமி(புடவைக்காரி அம்மன் மற்றும் பெரியாண்டிச்சி அம்மன்)  திருவிழாவில் முப்பூசையில் ஆடு,கோழி மற்றும் பன்றி பலியிடுவது வழக்கம்.

இம்முப்பூசையில் வன்னியர் வளர்த்த பன்றியை தவறுதலாக பிடித்து அம்மனுக்கு பலியிட இரு இனத்துக்கும் பிரச்சனை வருகிறது.அப்பிரச்சனையில் கொஞ்சம் கொஞ்சமாக மக்கள் வெளியேறி சேலம் அரூர் நெடுஞ்சாலையில் மஞ்சாவாடி கணவாய்க்கு அருகிலுள்ள கோம்பை ஊர்(கோம்பூர்) என்னும் ஊரில் குடியேறி தற்பொழுது அங்கு விவசாயம் செய்து வாழ்ந்து வருகின்றனர்.

ஆனால் இன்று,இவர்களின் குலசாமி கோவிலான சென்றாய பெருமாள் கோவில் மற்றும் மாரியம்மன் கோவில் வன்னியர் இன மக்கள் கட்டுப்பாட்டுக்குச் சென்று விட்டது.

புரட்டாசி,தை மற்றும் சித்திரை மாதத்தில் காராளர்(மலையாளி) இனத்தில் பெருமாள் சாமியை குலசாமியாக வணங்குபவர்கள் விழா எடுத்து வழிபாடு செய்வார்கள.அந்த மாதத்தில் இந்த மூலட்டான் வீடு (வாச்சான் வீடு) மக்களும் கோம்பூரிலிருந்து பெருமா பாளையத்துக்கு சென்று தன் குலசாமியாகிய சென்றாய பெருமாளை வழிபட்டு வருகிறார்கள்.

இந்த கோவிலுக்கு நிறைய நிலங்கள் இருப்பதால் இந்த கோவிலை அறநிலை துறை தன் கட்டுப்பாட்டில் எடுத்துக்கொண்டது.

தகவல் - காராளர் பிரவீன் கவுண்டர்,கோம்பூர்.